Бишкек прокуратураси Клооп нашрини ёпиш тўғрисида Бишкекнинг Октябрь туман судига даъво аризаси киритди. Бу маълумотни туман суди матбуот хизмати тасдиқлади. Иш суд муҳокамасига ўтказилди.
Шаҳар прокурори Эмилбек Абдиманаповнинг судга йўллаган мурожаатида улар амалдаги ҳукуматни танқид қилгани ва давлат идораларини обрўсизлантиргани учун портални ёпиш ниятида экани айтилади.
“Нашр веб-сайти ва ижтимоий тармоқларда чоп этилган материаллар амалдаги ҳукуматнинг сиёсатини кескин танқид қилишга қаратилган. Бундан ташқари, нашрларнинг аксарияти давлат ва ҳокимият органлар вакилларини обрўсизлантиришга қаратилган соф салбий хусусиятга эга”, — дейилади даъво аризасида.
Шунингдек, 2021 йилнинг ноябрида Миллий хавфсизлик давлат қўмитаси Клооп нашрига нисбатан ҳокимиятни тортиб олишга чақириш факти бўйича жиноий иш қўзғатгани таъкидланган.
2023 йил 29 март куни экспертлар суд-психологик экспертизаси натижаларига кўра, Клооп нашрларида “ҳозирги ҳукуматнинг амалдаги сиёсатини танқид қилишга, шунингдек, салбий тарғиботга қаратилган яширин ҳийлалар бор” деган хулосага келди.
